Konferenca e Komisioneve Parlamentare për Integrimin të shteteve të përfshira në Procesin e Stabilizim Asociimit të Europës Jug-Lindore

(COSAP)

COSAP u themelua në Sarajevë, në qershor të vitit 20015, si rezultat i konkluzioneve të Samitit të Selanikut 2003, i cili përcaktoi perspektivën europiane të vendeve të Europës Jug - Lindore, bazuar në meritë dhe reformat e ndërmarra në kuadër të zbatimit të detyrimeve të anëtarësimit. COSAP u konceptua si një forum që synonte nxitjen e reformave thelbësore të brendshme bazuar në aspiratën e përbashkët për integrimin në BE të këtyre vendeve. Ai është një forum për shkëmbimin e rregullt të mendimeve mbi Procesin e Stabilizim Asociimit, axhendën e anëtarësimit në BE dhe procesin e zgjerimit në tërësi. 

Gjatë takimit në Sarajevë u miratua rregullorja, e cila parashikon që Konferenca do të ketë një presidencë me rotacion dhe do të mblidhet dy herë në vit për të shqyrtuar çështjet aktuale lidhur me Procesin e Stabilizim-Asociimit dhe zgjerimin e BE-së.

Në konferencë marrin pjesë anëtarë të Komisioneve për Integrimin Europian të Parlamenteve nga Bosnje Hercegovina, Mali i Zi, Maqedonia, Serbia dhe Shqiperia. Ndërsa anëtarë të Komisioneve për Integrimin Europian nga Asambleja Kombëtare e Republikës së Turqisë dhe Parlamenti i Kosovës kanë statusin e të ftuarit.

COSAP është konfirmimi i gatishmërisë së vendeve pjesëmarrësve për zbatimin e reformave të bazuara në vlerat e BE-së si: zhvillimin e demokracisë, sundimin e ligjit, respektimin e të drejtave dhe lirive të njeriut, tolerancën dhe mirëkuptimin reciprok që sjell konsolidim dhe pajtim.

COSAP ka një perspektivë dhe axhendë të qartë për forcimin e bashkëpunimit midis komisioneve të integrimit europian, me ndihmën e rëndësishme të ofruar nga Parlamenti Europian dhe mund të konsiderohet një rrjet i suksesshëm e funksional.