Gjatë fjalës së tij, z. Bahir Shaqiri, tha se detyrën e kryetarit  të KLSH-së  e konsideron një përgjegjësi shumë të madhe, që përputhet me profesionalizmin  e tij. Z. Shaqiri vlerësoi komisionin për shqyrtimin e kandidaturës  dhe u shpreh se përparësi në punën e tij, do të jenë lufta kundër korrupsionit, për integrimin e Shqipërisë, në Bashkimit Evropian dhe  Reforma në Drejtësi. Mbas prezantimit të jetës së tij profesionale dhe akademike, kryetari i komisionit, z. Arben Ahmetaj  tha se z. Shaqiri plotëson kushtin për arsimimin, ka dhe disa kualifikime në fushën e sigurisë së marrëdhënieve ndërkombëtare, por nuk ka përvojë financiare, për organizimin dhe funksionimin e KLSH-së. Me votat e mazhorancës, komision rrëzoi dekretin e  Presidentit  dhe në Parlament do të dërgojnë draftin  për rrëzimin këtij propozimi.

Po sot, komisioni shqyrtoi projektligjin “Për ratifikimin letërmarrëveshjes ndryshuese të marrëveshjes së huasë, ndërmjet Republikës së Shqipërisë dhe Bankës Ndërkombëtare për Rindërtim dhe Zhvillim (IBRD), për financimin shtesë të projektit “Siguria e digave”, të ratifikuar me ligjin nr. 40/2012”. E pranishme në komision për të prezantuar  projektligjin dhe për të dhënë shpjegime ishte zëvendësministrja për Infrastrukturën dhe Energjinë, znj. Dorina Çinari dhe përfaqësues të kësaj ministrie. Më pas, komisioni e  miratoi ligjin në fjalë nen për nen, në parim, në tërësi dhe ia kaloi për shqyrtim seancës plenare.