Komsioni për Ekonominë dhe Financat u mblodh sot, nën drejtimin e kryetarit z. Arben Ahmetaj, për të diskutuar mbi aktin normativ nr. 2, datë 19.12.2018 “Për disa ndryshime në ligjin nr. 109/2017, “Për buxhetin e vitit 2018”, të ndryshuar. E pranishme në  Komision  ishte Ministrja e Ekonomisë dhe Financave, znj. Anila Denaj.

Në prezantimin e saj, ministrja znj. Denaj u ndal në objektivat  kryesore që synon ky akt.

“Objektivi i parë ishte të sigurojë hapësirën financiare shtesë për njësitë e vetëqeverisjes vendore, përmes rritjes së tavanit të shpenzimeve tyre me 3.4 miliardë lekë. Kjo, në përputhje me ecurinë pozitive të mbledhjes së të ardhurave vendore, të cilat në fakt për të gjithë vitin 2018 rezultuan me një tejkalim prej rreth 3 miliard Lekë. Tek pushteti vendor, zhvillim tjetër gjatë vitit 2018 dhe i reflektuar në ndryshimet e këtij Akti Normativ ka të bëjë me faktin se njësitë e vetëqeverisjes vendore gjatë 2018-ës kanë shlyer detyrime të prapambetura për një shumë prej rreth 2.1 miliardë lekë. Njësitë e vetëqeverisje vendore kanë trashëguar fonde nga vitet e mëparshme duke krijuar nga viti në vit një stok që ka rritur presionin për të kryer shpenzime. Në këto kushte, ishte e domosdoshme edhe krijimi i hapësirës fiskale për mbulimin me plan buxhetor të shpenzimeve me financim të huaj për pushtetin vendor në vlerën prej 1.3 miliard Lekë”, tha ministrja.

Gjatë fjalës së saj, znj. Denaj, theksoi faktin se për  vitit 2018 ekonomia u rrit me rreth 4.4% kundrejt të njëjtës periudhë të një viti më parë.

“Konsumi final total, i cili përbën peshën më të madhe në ekonomi, u rrit me rreth 2.83% në terma real vjetorë përgjatë nëntë muajve të parë të 2018, ndërsa konsumi final i popullatës u rrit me rreth 3.41%. Investimet totale u rritën me rreth 3.89% në terma real vjetorë përgjatë të njëjtës kohë. Ndërkohë vetëm për tremujorin e tretë të vitit 2018 norma e rritjes për investimet u zgjerua në 5.40%. Sektorët e bujqësisë dhe të ndërtimit patën një rritje dhe kontribut të qenësishëm pozitiv”, sqaroi ndër të tjera ministrja.

Relatori, z. Ervin Bushati  tha se akti normativ që po diskutojmë sot, ruan të pandryshuar treguesit makroekonomikë e fiskalë të parashikuar në fillim të vitit, duke vijuar tendencën e konsolidimit fiskal, me qëllim ruajtjen e stabilitetit makroekonomik të vendit dhe menaxhimin me efektivitet të financave publike.

“Gjatë vitit 2018 ekonomia shqiptare vijoi tendencën pozitive. Rritja reale e PBB, nga 3.8 për qind në vitin 2017, arriti 4.2 për qind në vitin 2018. Defiçiti buxhetor mbetet 2 për qind e PBB, ndërsa sufiçiti primar mbetet në terma pozitivë, 8.6 miliardë lekë ose 0.5 për qind e PBB”, tha z. Bushati.

Më pas fjalën e mori, zëvendëskryetarja e komisionit znj. Jorida Tabaku, e cila u shpreh se  ky akt normativ thekson mungesën e investimeve publike dhe rënia e besimit në ekonomi, që është kambanë alarmi. 

“Besimi i biznesit ka rënë me 1.2 pikë dhe shqetësim është kur ky besim bie për 3 mujor me radhë. Kjo ndodh prej pesimizmit ne ekonomi, mungesës së investimeve publike, bizneset sot paguajnë 1.9 miliardë  më shumë euro taksa  dhe e kanë të pamundur të rrisin punësimin.

Borxhi publik nuk është llogaritur si duhet dhe nuk janë shifra të drejta,  pasi nuk janë llogaritur TVSH dhe detyrimet e prapambetura. Nuk e di nëse Ministrja e Financave ka një llogari për koncesionet dhe PPP. Nuk kemi regjistër të plotë për kontratat dhe nuk kemi një regjistër të plotë të detyrimeve dhe kontratave që janë nënshkruar.  Procedurat për tenderat bëhen pa garë. Janë ulur shpenzimet për ish të përndjekurit”, theksoi znj. Tabaku.

Për sa i takon PPP,  z. Ahmetaj tha se ka një iniciativë të ndërmarrë nga qeveria, një ligj të dorëzuar në parlament në dhjetor të këtij viti që rishikon kuadrin e koncesione.

“Ne nuk do heqim dorë nga zhvillimi i investimeve publike dhe nëpërmjet instrumenteve të koncesionit dhe PPP. Ju i thoni popullit të Dibrës që nuk meritoni rrugë, i thoni popullit shqiptar që nuk duhet të ketë aeroport etj. Përpjekje juaj për të demonizuar PPP shkon në kundërshtim me interesin publik dhe me zhvillimin ekonomik të vendit”, tha Ahmetaj, ndërsa shtoi se ekonomia shqiptare  ka  konkurrueshmëri dhe produktivitet të lartë. Sipas tij, në buxhetin 2018 ka një rritje të ekonomisë në 4.4%,  ka një  rritje të eksportit me 15%, ka një ulje të taksës për biznesin e vogël, etj.

Pas diskutimeve, anëtarët e komisionit e miratuan aktin normativ për buxhetin  e vitit 2018-të dhe ia kaluan për shqyrtim seancën plenare.

Më tej, komisioni vijoi mbledhjen me shqyrtimin e propozimeve  për disa shtesa dhe ndryshime, në ligjin “Për buxhetin e vitit 2019”, nismë e dy deputeteve të LSI-së znj. Kejdi Mehmetaj dhe znj. Floida Kërpaçi. Deputetet nismëtare në prezantimin e tyre, kërkuan dyfishimin e zërave për Arsimin Universitar dhe Kërkimin Shkencor, duke e çuar rreth 1% të PBB, me vlerë 14.909.916.000Lek  për AU  dhe 124.000.000 Lek KSH, me qëllim përgjysmimin e tarifave deri në zerimin e tyre, pajisjen e studentëve me Kartën e Studentit, ngritjen e Bibliotekës Online.  Gjithashtu, deputetet propozuan dhe krijimin e fondit të Emergjencës në Arsimin  e Lartë, i cili do të orientohet drejt rikonstruksionit të konvikteve , ndërtimin e kapaciteteve të reja duke krijuar kushte bazike, për një jetesë normale të studentëve gjatë viteve të tyre të studimit. Relatorja znj. Blerina Gjylameti tha se ky projektligj adreson një sërë problematikash që janë adresuar dhe grupi i punës i ngritur nga Kryeministri për Universitetin dhe 8 kërkesat e tyre janë të formalizuara në vendime të Këshillit të Ministrave dhe kanë dhënë efekt që nga data 1 janar 2019. Në përfundim, kryetari z. Ahmetaj u shpreh se propozimet do ti dërgohen Këshillit të Ministrave  dhe më pas do të diskutohen sërish në komision për këtë çështje.