Komisioni për Integrimin Evropian miratoi dy projektligje

  • Postuar më, 26/01/2021

26 janar 2021

 

Komisioni për Integrimin Evropian, në drejtimin e nënkryetares, znj. Senida Mesi, në cilësinë e komisionit për dhënie mendimi shqyrtoi dhe miratoi në mbledhjen e sotme dy projektligje. Projektligjet e miratuara ishin: “Për të dhënat e hapura dhe ripërdorimin e informacionit të sektorit publik” dhe “Për ratifikimin e marrëveshjes së financimit, ndërmjet Republikës së Shqipërisë dhe Komisionit të Bashkimit Evropian, në lidhje me programin vjetor kombëtar për Shqipërinë për vitin 2019, në kuadër të instrumentit të asistencës së paraanëtarësimit (IPA II)”.

I pranishëm në mbledhje për prezantimin e projektligjit të parë ishte z. Etjen Xhafaj, zëvendëministër i Infrastrukturës dhe Energjisë dhe specialistë të lartë të MIE dhe KDIMDP-së. Zëvendësministri Xhafaj, bëri me dije se projektligji siguron bazën ligjore për përdorimin e të dhënave të hapura dhe të drejtën e ripërdorimit, për qëllime tregtare ose jo, të dokumenteve që mbahen nga organet e sektorit publik ose sipërmarrjet publike, me qëllim për të nxitur inovacionin në produkte dhe shërbime. Gjithashtu, z. Xhafaj shtoi se projektligji synon transpozimin e Direktivës (BE) 2019/1024, të Parlamentit Evropian dhe të Këshillit të datës 20.6.2019, “Për të dhënat e hapura dhe ripërdorimin e informacionit të sektorit publik”, lidhur me ripërdorimin e informacionit të sektorit publik në mënyrë që  potenciali i informacionit të sektorit publik për ekonominë dhe shoqërinë shqiptare, të shfrytëzohet i plotë duke u mbështetur në praktikat e Bashkimit Evropian. Pas pyetjeve dhe diskutimeve, komisioni e miratoi këtë projektligj në parim, nen për nen dhe në tërësi.

I pranishëm ishte kryenegociatori i BE-së për integrimin. Ai theksoi rëndësinë e dimensionit parlamentar ne çështjen e integrimit dhe vlerësoi rolin e komisioneve parlamentare, e sidomos atij të integrimit. Z. Zef Mazi, kryenegociatori i Shqipërisë për aderimin në BE, paraqiti për komisionin projektligjin e dytë.  Sipas z. Mazi, programi vjetor i vitit 2019, mbështetur në Dokumentin Strategjik Kombëtar për plotësimin e objektivave të integrimit, do të mbështesë përfshirjen sociale dhe programi vjetor “BE për përfshirjen sociale” dhe ka si qëllim të kontribuojë në forcimin e përfshirjes sociale, duke rritur mbulimin, përfshirjen dhe efektivitetin e shërbimeve të kujdesit social, dispozitat e edukimit gjithëpërfshirës dhe mundësitë e punësimit. Objektivi i përgjithshëm i këtij programi për vitin 2019 është që të zgjerojë mbulimin, gjithëpërfshirjen, efektivitetin dhe reagimin ndaj emergjencave të shërbimeve të kujdesit social, arsimin parauniversitar dhe mundësitë e punësimit për të rinjtë dhe të rriturit në Shqipëri, duke përfshirë popullatat në rrezik përjashtimi. Z. Mazi vuri theksin te fakti që kontributi i përgjithshëm i BE-së për përfshirjen sociale shkon në 70.65 milionë euro. 71.95 milionë euro është kostoja totale e programit. Z. Mazi theksoi se në kuadër të tërmetit të vitit 2019 dhe pandemisë, KE pati vendosur rialokimin e fondeve IPA për 2019-n. Në përfundim të pyetjeve dhe diskutimeve, komisioni e miratoi edhe këtë projektligj.

Mbledhja e sotme, në vijim të të tjerave, për shkak të masave të posaçme në kuadër të pandemisë, i zhvilloi punimet e saj përmes platformës elektronike të komunikimit “Cisco Webex”. 


Share