Delegacioni parlamentar në Asamblenë e NATO-s mori pjesë në webinarin me temë "Përgjigja e NATO-s ndaj COVID-19"

  • Postuar më, 07/05/2020

Në kushtet e pandemisë globale kur takimet direkte janë të pamundura, Asambleja Parlamentare e NATO-s mbajti ditën e sotme webinarin e parë me temë "Përgjigjia e NATO-s mbi COVID-19".

 Parlamentarët nga vendet NATO morën një informacion të përgjithshëm mbi veprimet e Aleancës në mbështetje të vendeve anëtare por edhe atyre partnere gjatë këtyre muajve të vështirë,  nga z. James Appathurai, Zëvendës asistent i Sekretarit të Përgjithshëm për Çështjet Politike dhe të Sigurisë.

 Z. Appathurai prezantoi sfidat me të cilat Aleanca u ndesh që në krye të herës të kësaj pandemie si dhe foli mbi procesin e adaptimit të mekanizmave të saj për të arritur sa më shpejt rezultate konkrete. Ai tha se Spanja, Italia, Maqedonia e Veriut janë vetëm disa prej vendeve anëtare të cilat janë ndihmuar nga këto mekanizma të aktivizuara menjëherë prej Aleancës. Sipas tij kjo situatë tregoi edhe një herë solidaritetin mes vendeve anëtare. 

Gjithashtu ai u bëri thirrje deputetëve të vijojnë të këmbëngulin për rritjen e buxhetit të mbrojtjes, duke mos hequr vëmendjen nga mbrojtja si një mënyrë për të mbajtur të sigurt mjedisin për investitorët, duke ndikuar në mënyrë të drejtpërdrejtë në rritjen e ekonomive respektive.

Gjatë ndërhyrjes së saj, Kryetarja e delegacionit shqiptar znj. Mimi Kodheli pranoi falenderimet ardhura nga delegacioni italian për ndihmën që vendi ynë i dha Italisë me dërgimin e ekipit mjekësor si dhe vlerësoi punën e NATO-s si dhe përgjigjen dhënë prej saj në këtë situatë. Po ashtu ajo nënvizoi rëndësinë e përfshirjes së ekipeve të kimisë si dhe të strukturavë të inteligjencës për të parandaluar që ngjarje të tilla të mos ndodhin dhe të mos kenë efekt te tille në të ardhmen.

 Delegacionet parlamentare në Asamblenë e NATO-s kanë pasur shkëmbime gjatë kësaj periudhe pandemie si dhe janë duke përgatitur disa raporte mbi ndikimin në ekonomi të COVID-19, e po ashtu pritet që në javët e ardhshme të mblidhet Komisioni i Përhershëm për të vendosur në lidhje me aktivitetet të cilat për momentin janë shtyrë ose kanë ndryshuar formën e tyre.


Share