Kryetari i Kuvendit, z. Gramoz Ruçi, i ka dërguar sot një letër urimi  Presidentit tëAsamblesë së Madhe Kombëtare të Turqisë, z.Mustafa Sentop, me rastin e 100-vjetorit të themelimit të saj.

“Me rastin e 100-vjetorit të Asamblesë së Madhe Kombëtare të Turqisë, e cila u mblodh për herë të parë në vitin 1920 në Ankara, në emrin e Kuvendit të Shqipërisë si edhe në emrin tim personal, Ju uroj suksese të mëtejshme nëzhvillimin dhe  përparimin e Turqisë, konsolidimin e jetës parlamentare dhe institucioneve tëtjera demokratike.

Krijimi i Asamblesë së Madhe Kombëtare ishte një sukses shumë i rëndësishëm i Turqisë dhe hodhi themelet për një republikë të pavarur, laike e moderne si edhe zhvillimin dhe mirëqenien e popullit turk.

Populli shqiptar dhe Kuvendi i Shqipërisë gëzohen sinqerisht për arritjet e Turqisë mike dhe i urojnë avancim të mëtejshëm në rrugën e progresit dhe demokracisë si edhe kontributin e madh për zhvillimin, paqen, stabilitetin dhe sigurinë në rajon e më gjerë.

100-vjetori i Asamblesë së Madhe Kombëtare të Turqisë kremtohet në një kohë të vështirë për Turqinë, por edhe për të gjitha vendet e botës.  Turqia, ashtu si edhe Shqipëria dhe gjithë popujt në planet, janë përfshirë në një betejë për mbrojtjen e jetëve njerëzore prej përhapjes së pandemisë së COVID-19. Ne, shqiptarët, ndjekim me vëmendje betejën e mjekëve, institucioneve dhe popullit vëlla turk kundër këtij rreziku dhe gëzohëmi për mbrojtjen e shpëtimin e çdo jete njerëzore.

Në luftën kundër COVID-19 asnjë vend nuk është i vetëm, por ka mbështetjen e solidaritetin e gjithë njerëzimit. Të gjithë dëshirojmë  me gjithë shpirt që e keqja të ndalet sa më shpejt dhe popujt tanë si edhe të gjithë popujt e botës t’u kthehet jetës normale dhe gëzimeve të saj.

Duke përfunduar, më lejoni, Zoti President, të shpreh edhe njëherë urimet e  mia më të sinqerta me rastin e 100-vjetorit tëAsamblesë së Madhe Kombëtare të Turqisë dhe të shpreh besimin se bota dhe vendet tona shumë shpejt do ta fitojnë këtë betejëdhe Kuvendi i Shqipërisë dhe Asambleja e Madhe Kombëtare e Turqisë do të vazhdojnë bashkëpunimin e shkëlqyer midis tyre. “, shkruhet në letrën e urimit të Kryetarit të Kuvendit, z. Gramoz Ruçi, drejtuar Presidentit të Asamblesë së Madhe Kombëtare të Turqisë, z. Mustafa Sentop.