­

icon-5 Lajmet e fundit

Kuvendi i Shqipërisë, në kuadër të Ditës Kombëtare të Jetimëve, priti 200 fëmijë jetimë.

19 Maj 2018
Kuvendi i Shqipërisë, në kuadër të Ditës Kombëtare të Jetimëve, me kujdesin e veçantë të Kryetarit të Kuvendit, z. Gramoz Ruçi dhe në bashkëpunim me Institutin Kombëtar të Integrimit të Jetimëve Shqiptarë, priti sot në sallën e seancave plenare 200 fëmijë jetimë nga Shqipëria dhe Kosova.
Të pranishëm në aktivitet ishin zëvendëskryetarja e Kuvendit, znj. Vasilika Hysi, deputetë të Kuvendit të Shqipërisë, që janë edhe anëtarë të grupit “Miq të Fëmijëve”, si edhe shumë figura të shquara të jetës publike nga arti, shkenca, komunitetet fetare, televizioni dhe muzika. Kryegjyshi botëror i bektashinjëve, Haxhi Baba Edmond Brahimaj, aktorët Luftar Paja, Mirush Kabashi, Marjana Kondi, Raimonda Bulku, Rudina Dembacaj, tenori Kastriot Tusha, artistët Bujar Kapexhiu dhe Mimika Luca, kompozitori Agim Krajka, këngëtarët Justina Aliaj, Luan Zhegu, Irma Libohova, Manjola Nallbani, Kozma Dushi, moderatorja Silvana Braçe, miss-i i parë shqiptar Valbona Selimllari, si edhe figura të tjera të njohura të ekranit si Eni Çobani dhe motrat Marina dhe Luana Vjollca ishin të pranishëm në aktivitetin e sotëm për t’u qëndruar pranë fëmijëve në aktivitetin e tyre.
Fëmijët jetimë simuluan një seancë plenare, ku përmes fjalimeve të mbajtura, paraqitën me plot mjeshtëri fjale kërkesat e tyre për më shumë solidaritet, si një shtresë e veçantë që meriton ndihmën, vëmendjen dhe kujdesin e posaçëm nga shoqëria dhe strukturat shtetërore përgjegjëse. Fëmijë nga qytete të ndryshme të Shqipërisë dhe Kosovës, sollën në foltore të Kuvendit emocione të ndjera nga jetimë të luftës së Kosovës, të prindërve të rënë në krye të detyrës, në aksidente pranë vendit të punës etj. Fëmijët jetimë, përmes fjalëve në foltoren e Kuvendit përcollën mesazhe të forta për një shoqëri më solidare ndaj jetimëve.
Zëvendëskryetarja e Kuvendit, znj. Vasilika Hysi, në përmbyllje të aktivitetit mbajti një fjalë përshëndetëse. Seancën me fëmijët jetimë zëvendëskryetarja e cilësoi si ndër më emocionueset për t’u drejtuar.
“Përgjatë të enjteve ne kemi bërë seanca, ku kemi miratuar ligje të mira, siç ishte ligji “Për Strehimin Social”, që e përgatiti me shume shpirt kolegia ime, znj.Eglantina Gjermeni.  Kur ishte ministre e Ministrisë së Zhvillimit Urban,  në qeverisjen e mëparshme, ajo loboi shumë që fëmijët jetimë, nënat me fëmijët jetimë, personat e vetëm dhe shumë kategori të tjera si romë, egjiptian, etj., të jenë parësor në strehimin social. Por krahas ligjeve të mira, siç është edhe ligji për të drejtat e fëmijëve dhe mbrojtjen e tyre, kemi bërë debate shterpë, ku ju kemi lënduar juve, ju kemi dëmtuar dhe nuk kemi mundur të ofrojmë atë që duhet. Kjo seancë, kjo sallë, kjo foltore, është dëshmitare shpesh e debateve patetike. Ndërsa ju të gjithë keni diskutuar me një etikë të veçante dhe i kemi qëndruar thelbit të seancës”, -iu drejtua znj. Hysi fëmijëve.
Znj. Hysi, pasi u zotua në fjalën e saj për më shumë përpjekje nga politika në drejtim të ndihmës ndaj fëmijëve jetimë, e rrethuar nga emocioni që u përcoll gjatë simulimit të seancës plenare të fëmijëve, ndau me të pranishmit një ndjesi dhe përjetim personal:

“Unë i ndjek problemet, shqetësimet e fëmijëve jetimë, jo vetëm sepse drejtoj një komision për të drejtat e njeriut, por unë jam rritur nga dy prindër, që janë rritur jetimë që në ditët e para të jetës së tyre. Dy prindërit e mi janë rritur jetimë dhe ndërkohë xhaxhallaret e mi janë rritur në shtëpinë e foshnjës.

Dy gjyshër, që janë rritur në shtëpinë e foshnjës dhe unë nuk i kam njohur gjyshërit e mi”, – u shpreh zëvendëskryetarja e Kuvendit.

Znj. Hysi i ftoi fëmijët jetimë të jenë prezentë në një seancë plenare me praninë e të gjithë deputetëve të Kuvendit të Shqipërisë, për të qenë të dëgjuar në të gjitha problematikat e tyre.
“Në emër të Kryetarit të Kuvendit të Shqipërisë, z. Gramoz Ruçi, jeni të ftuar të kuvendojmë se cilat do të ishin dy-tre iniciativat e para, që ne duhet t’i ndërmarrim dhe finalizojmë  me sukses në këtë periudhë dhe do të ishte mirë që me rastin e festës së 1 qershorit një nga këto iniciativa të finalizohej”,- tha në fjalën e saj zëvendëskryetarja Hysi.
Në mbyllje të aktivitetit z.Ilir Cumani shprehu falenderimet e tij, në emër të fëmijëve dhe institutit që drejton, për kujdesin e Kuvendit të Shqipërisë në mbarëvajtjen e këtij aktiviteti.
19 Maj 2018|

Nënkryetarja e Kuvendit të Shqipërisë znj.Vasilika Hysi vizitoi “Festivalin Ditënetët e Librit”, që po organizohet nga Klik Ekspo Group në bashkëpunim me Ministrinë e Kulturës, nga data 16-20 Maj në Muzeun Kombëtar

 

 

18 Maj 2018

Nënkryetarja e Kuvendit të Shqipërisë znj.Vasilika Hysi vizitoi “Festivalin Ditënetët e Librit”,  që po organizohet nga Klik Ekspo Group në bashkëpunim me Ministrinë e Kulturës, nga data 16-20 Maj në Muzeun Kombëtar.

Znj.Hysi vizitoi stendat e ngritura ne panair dhe u përshëndet me pjesëmarrësit në këtë evemiment.

Pjesëmarrja e Kuvendit në këtë festival libri, pasqyron qartë që Biblioteka e Kuvendit përveç dokumentacionit parlamentar të mirëmbajtur në vite, pasurohet vazhdimisht me botime te reja parlamentare.

Në stendë  e Kuvendit të Shqipërisë, znj.Hysi mbajti një fjalim ku u shpreh: “Në rradhë të parë unë do doja shumë t’ju falënderoja juve gazetarëve për mbulimin e këtij aktiviteti, festivali kulturor shumë të rëndësishëm dhe unë sot ndihem shumë e privilegjuar që jam në këtë pjesë të kuvendit të Shqipërisë. Unë do falënderoja shumë Z.Luan për këtë qasje të re të festivalit që bëni në bashkëpunim me Ministrinë e Kulturës. Më pëlqen titulli që keni vënë Ditënetët tregon që nuk ka thjesht një pavijon ku shiten tekste, libra por ka edhe një sërë aktivitetesh kulturore. Unë do doja të theksoja që Kuvendi i Shqipërisë për herë të parë merr pjesë në këtë festival. Është një gjë shumë e mirë, në Kuvendin e Shqipërisë çdo qytetar, çdo lexues, çdo historian por dhe çdo qytetar i thjeshtë mund të gjejë botime shumë interesante duke filluar që nga bisedimet parlamentare të periudhës 20’-39’, dhe mua më vjen mirë që stafi i Kuvendit ka bërë në formën e një CD-je pa qenë nevoja për të pasur libra të mëdhenj, edhe për ata që nuk kanë një shtëpi të mjaftueshme për të pasur biblioteka të mëdha, mjafton të marri këtë CD. Do të ftoja këtu gjithë studentët e fakultetit të historisë, gjithë historianët si ata që janë aktiv dhe ata që kanë interesa, janë në pension, janë qytetar, por mbi të gjitha studentët e fakulteteve të drejtësisë, historisë etj. për të marrë këtë bisedim parlamentar dhe për ta studiuar e për të mësuar edhe më shumë.

Uroj dhe shpresoj që këto botime të shkojnë në duart e gjithë atyre personave që kanë interes dhe kanë nevojë. Ajo që unë kam kuptuar është që ne kemi nevojë për më shumë aktivitete të tilla jo thjesht një panair ku shiten libra, por për të marrë kulturë, informacion dhe bashkëbiseduar. Shumë faleminderit.”

Në këtë stendë qëndrojnë të ekspozuara botimet parlamentare që janë realizuar prej vitit 1991 në këtë Institucionin e Kuvendit të Shqipërisë dhe që janë një vlerë e padiskutueshme.

 

18 Maj 2018|

NJOFTIM

Kuvendi i Shqipërisë, me rastin e Ditës Kombëtare të Jetimëve dhe në kuadër të komunikimit me publikun, zhvillon aktivitete në datat 19 dhe 20 maj 2018.

Në bashkëpunim me Institutin Kombëtar të Integrimit të Fëmijëve Shqiptarë, Kuvendi pret 200 fëmijë jetimë në sallën e seancave plenare, ditën e shtunë, ora 11.00, dt. 19 maj 2018. 

Fëmijët jetimë do të simulojnë një seancë plenare, në fund të së cilës, Zëvendëskryetarja e Kuvendit, znj. Vasilika Hysi, do të mbajë një fjalë përshëndetëse.

Gjithashtu, ditën e dielë, dt. 20 maj 2018, ora 10.00, në sallën e seancave plenare të Kuvendit të Shqipërisë, në bashkëpunim me Shoqatën Kombëtare të Jetimëve Shqiptarë, zhvillohet një tjetër aktivitet në të cilin marrin pjesë fëmijë jetimë nga e gjithë Shqipëria.

Aktiviteti do të përshëndetet nga deputetë të Kuvendit të Shqipërisë, anëtarë të grupit të deputetëve “Miq të Fëmijëve” dhe anëtarë të Komisionit të Shëndetësisë, Punës dhe Mirëqenies Sociale.

Ftohen mediat, për të dy aktivitetet, në ndjekjen dhe pasqyrimin e veprimtarive përkatëse.

18 Maj 2018|

Kuvendi miratoi në seancë plenare dy raporte vjetore institucionesh të pavarura dhe dy projektligje

17 maj 2018

 

Në drejtimin e Kryetarit të Kuvendit të Shqipërisë, z. Gramoz Ruçi, Kuvendi u mblodh në seancë plenare. Në fillim të punimeve të seancës deputeti i Partisë Socialiste z.Spartak.Braho, mori mandatin dhe kreu betimin zyrtar pas dorëheqjes së një tjetër deputeti në listën e qarkut të Tiranës.

Punimet e Kuvendit vijuan me miratimin e raportit vjetor të veprimtarisë së Bankës së Shqipërisë për vitin 2017 dhe raportin vjetor të veprimtarisë së Agjencisë së Sigurimit të Depozitave për vitin 2017. Dy titullarët e institucioneve përkatëse, z. Genc Sejko dhe z. Genc Mamani, raportuan përpara Kuvendit të Shqipërisë. Dy raportet u miratuan nga Kuvendi me 74 vota pro.

Kuvendi, pas raportimeve të z. Sejko dhe z. Mamani, vijoi me diskutimet e projektligjit “Për disa shtesa dhe ndryshime në ligjin nr. 10385, datë 24.2.2011 “Për ndërmjetësimin në zgjidhjen e mosmarrëveshjeve” si edhe projektligjin “Për trashëgiminë kulturore dhe muzetë”.

Në emër të Grupit Parlamentar të Partisë Socialiste, në projektligjin “Për ndërmjetësimin në zgjidhjen e mosmarrëveshjeve”, deputeti i Partisë Socialiste, z. Bledi Çuçi, theksoi se projektligji vjen si një ndër ligjet e propozuara në kuadër të reformës në drejtësi. Deputeti i Partisë Socialiste, në fjalën e tij, iu referua dokumentit të analizës së sistemit të drejtësisë dhe mangësive të sugjeruara prej tij në sistem. Sipas dokumentit, z. Çuçi veçoi faktin që zbatimi i ligjit aktual për ndërmjetësimin nuk e ka arritur qëllimin e tij. Gjithashtu, deputeti theksoi se Gjykatat nuk janë treguar aktive në thirrjen e ndërmjetësuesve.

“Megjithëse ky institut mbetet relativisht i ri, konstatohet se nuk ka gjetur zbatimin e duhur në fushën e të drejtës. Së fundmi, nga pikëpamja statistikore mjafton të shohim se nga të dhënat e regjistrit të ndërmjetësve rezulton se nga 567 ndërmjetës të licencuar, ushtrojnë efektivisht vetëm në praktikë, vetëm 73 subjekte. Kështu që, ndryshimet e reja që propozohen në ligjin për ndërmjetësimin e zgjedhjes së mosmarrëveshjeve fokusohen në modernizimin e statusit të ndërmjetësit duke forcuar standardet etike sipas Kodit Etik Evropian“, – tha deputeti i Partisë Socialiste, z.Çuçi.

Projektligji “Për disa shtesa dhe ndryshime në ligjin nr. 10385, datë 24.2.2011 “Për ndërmjetësimin në zgjidhjen e mosmarrëveshjeve” u miratua me 74 vota pro.

Ministrja e Kulturës, znj. Mirela Kumbaro, si e vetmja diskutante për projektligjin “Për trashëgiminë kulturore dhe muzetë”, e cilësoi si moment të rëndësishëm për trashëgiminë kulturore sjelljen e këtij projektligji në stadin e votimit nga Kuvendi. Znj.Kumbaro e vuri theksin në fjalën e saj te rëndësia që ka për Ministrinë e Kulturës dokumentimi i pasurive të veta, gjendjes së tyre, ndërtimit të strategjive dhe prioriteteve me rregulla të qarta mbrojtjeje në fushën e trashëgimisë kulturore.

“Trashëgimia kulturore dhe fondi muzeal janë fusha ku të gjithë aktorët e shoqërisë kanë një rol për të luajtur. Duhen rregulla të qarta, ligje të detajuara dhe procedura të shpjeguara mirë. Kjo është arsyeja pse katër vjet më parë nisëm punën për një kuadër të ri ligjor”, – u shpreh ministrja Kumbaro, e cila tha gjithashtu se projektligji  ka vlerësuar sfidat e së ardhmes në kontekstin historik të viteve te shkuara.

Si qëllime të projektligjit të ri, ministrja Mirela Kumbaro, listoi: ruajtjen, mbrojtjen, vlerësimin dhe administrimin, si katër shtyllat e këtij projektligji të trashëgimisë kulturore kombëtare, “përfshirë atë materiale dhe jo materiale, si kontribut në ruajtjen e kujtesës kombëtare në territorin e Republikës së Shqipërisë dhe si nxitje e zhvillimit kulturor të vendit, duke vlerësuar si pasuritë kulturore të mbi tokës ashtu edhe ato të nëntokës dhe nën ujit.”

Si qëllim të projektligjit, ministrja në fjalën e saj vuri në dukje përcaktimin e marrëdhënies dhe rregullave për krijim, akreditim, funksionim dhe organizim të muzeve publik dhe privat në Republikën e Shqipërisë, si edhe vënien në mbrojtje të pasurisë së peizazhit kulturor.

Në fund të diskutimeve, projektligji “Për trashëgiminë kulturore dhe muzetë”, u miratua me 74 vota pro.

Seanca i mbylli punimet në orën 12:45.

17 Maj 2018|
Te Gjitha

projektligje

libraria-e-akteve

icon-13 Kontakto deputetin tënd

Deputetet Iniciale