Në 20 vite, vendimi i djeshëm i komisioneres Malmstrom është vendimi më i rëndësishëm, më i mirëpritur, është lajmi më i bukur që ndonjëherë shqiptarët, kanë pasur në jetën e tyre, S’ka gjë më të bukur për këta të rinj dhe të reja, për këto studentë që me këtë vendim, e shohin veten si të gjithë të rinjtë e tjerë të Europës. Jemi krenarë që ia arritëm. Këto muaj, Parlamenti ka bërë një punë titanike.

Të rinjtë, në një risi festuan në të njëjtën ditë, në të njëjtën orë me bashkëmoshatarët e tyrë në Europë. Qytetarët e Tiranës shijuan sot këtë festë të të rinjve në Bulevard. Kryetarja e Kuvendit i tha të rinjve se: Ju jeni e ardhmja e Shqipërisë Europiane. Ne duam që ju të lëvizni pa viza. Të rinjtë maturantë të Shqipërisë festuan sot njëkohësisht me të gjithë bashkëmoshatarët e tyre në të gjithë Europën në ditët e Europës.

Kryetarja e Kuvendit, u shpreh se jo rastësisht kjo ditë e madhe po festohet me të rinjtë, sepse mbi të gjitha “Shqipëria në Nato” është festa e të rinjve, që patën fatin të jetojnë në kohërat e lirisë, në kohën e rrëzimit të diktaturës komuniste.

"Ky përvjetor është një datë e jashtëzakonshme, që koincidon me 20 vjet rrëzim të komunizmit. U rrëzua komunizmi, sepse synohej NATO, sepse synohej perëndimi, sepse synohej një komunitet unik i vlerave të përbashkëta, në të cilat sot ne ndihemi pjesë. Në qoftë se lexojmë deklaratën Samitit të Strasburgut një vit më parë, ajo thotë se ne e pranojmë Shqipërinë, sepse ne ndajmë me këtë vend demokracinë, ndajmë me këtë vend liritë individuale, ndajmë me këtë vend shtetin ligjor, ndajmë me të këtë vend vlerat.

“Në këtë përvjetor të ngjarjes historike të Shqipërisë në NATO, unë nuk mund të rri pa përmendur edhe një përvjetor tjetër, 2 prillin, i cili më kujton atë ditë të vështirë, kur katër të rinj, ndonjëri pak mbi moshën tuaj, të tjerët pak a shumë sa ju, u vranë në Shkodër, sepse kërkonin lirinë dhe kërkonin rrëzimin e komunizmit. Le të nderojmë kujtimin e 2 prillit të këtyre katër të rinjve. Të mbajmë një minutë heshtje për ta” u shpreh Kryetarja e Kuvendit, Jozefina Topalli.