Kuvendi mblidhet në seancë plenare

Kuvendi u mblodh në seancë plenare dhe miratoi, ndër tjera, rezolutën për vlerësimin e veprimtarisë të Inspektoratit të Lartë të Deklarimit dhe Kontrollit të Pasurive për vitin 2011.
Në hapje të seancës, Kryetarja e Kuvendit, Jozefina Topalli njoftoi deputetët për mbledhjen e Këshillit të Rregullores, Mandateve dhe Imunitetin, në lidhje me zëvendësimin e Presidentit të zgjedhur Bujar Nishani nga zoti Vath Tabaku, bazuar në listën shumëemërore të dërguar nga Komisioni Qendror i Zgjedhjeve. Kryetarja e Kuvendit njoftoi seancën se raporti i Këshillit të Rregullores i hartuar për këtë rast u miratua me konsensus.
Në vijim, zoti Tabaku bëri betimin si deputet i ri i Kuvendit të Shqipërisë.

Seanca vijoi punimet me shqyrtimin dhe miratimin e projektligjeve të parashikuara në rendin e ditës.
Pas diskutimeve të deputetëve, Kuvendi miratoi projektligjin “Për informacionin e konsumit të energjisë dhe burimeve të tjera të produkteve me ndikim në energji” dhe projektligjin “Për sistemin arsimor parauniversitar në Republikën e Shqipërisë”.

Ndërkohë, me propozim të kryetarëve të Grupeve Parlamentare të Partisë Demokratike dhe Partisë Socialiste, Astrit Patozi dhe Gramoz Ruçi, Kuvendi miratoi shtyrjen e afatit të komisionit parlamentar për reformën zgjedhore deri më 12 korrik 2012.

Seanca plenare i mbylli punimet në orën 16.25.