Komisioni për Integrimin miraton dy projektligje të rëndësishme

Komisioni për Integrimin Europian mori sot në shqyrtim projektligjin “Për disa shtesa dhe ndryshime në ligjin nr. 9367, datë 7.4.2005 “Për parandalimin e konfliktit te interesave në ushtrimin e funksioneve publike”, të ndryshuar, si dhe Projektligji “Për disa shtesa dhe ndryshime në ligjin nr. 9049, datë 10.4.2003 “Për Deklarimin dhe Kontrollin e Pasurive, të detyrimeve financiare të të zgjedhurve dhe të disa nëpunësve publikë”, të ndryshuar.

Ndryshimet vijnë si propozim i Ministrit për Inovacionin dhe Teknologjinë e Informacionit dhe Komunikimit, Genc Pollo, që është njëkohësisht edhe kryetar i grupit ndërministror të punës për Strategjinë Antikorrupsion.
Këto ndryshime synojnë të saktësojnë detyrimet konkrete, përgjegjësitë, mjetet dhe procedurat ligjore për zbatimin e tyre në praktikë, si dhe sanksionet për shkelje të caktuara, duke shmangur referimet e tepërta dhe duke i bërë të dy ligjet më të plotë, më efektivë dhe më të saktë nga pikëpamja e teknikës legjislative.

Në përfundim të diskutimeve nen për nen, Komisioni e miratoi edhe në tërësi projektligjin në fjalë dhe u shpreh dakord për kalimin e tij në seancë plenare.