Këshilli për Legjislacionin dhe Komisioni për Çështjet Ligjore, Administratën Publike dhe të Drejtat e Njeriut zhvillon seancë dëgjmore me grupet e Interesit dhe ekspertët ligjorë për nismën e ndryshimit të Kushtetutës, për heqjen e imunitetit.

Këshilli për Legjislacionin dhe Komisioni për Çështjet Ligjore, Administratën Publike dhe të Drejtat e Njeriut, nën drejtimin e Kryetares së Kuvendit Jozefna Topalli zhvilloi sot  një seancë dëgjimore me grupet e Interesit, përfaqësues të misioneve të Bashkimit Europian, PACA dhe EURALIUS dhe ekspertë konstitucionalistë,  lidhur me nismën për ndryshimin e Kushtetutës për heqjen e imunitetit për deputetët, të gjyqtarëve dhe zyrtarëve të lartë.

Nisma për ndryshimin e Kushtetutës për heqjen e imunitetit, është një projekt i hartuar me ekspertizën më të mirë të misioneve të Bashkimit Europian në fushën e luftës kundër korrupsionit dhe konsolidimit të sistemit gjyqësor, PACA dhe EURALIUS.

Në seancën e sotme u zhvillua një diskutim maratonë pyetjesh dhe përgjigjesh, u dhanë mendime, sugjerime dhe përvoja nga sistemet e tjera parlamentare të Evropës për heqjen  e  imuniteteve dhe kërkesës për ndryshimet në Kushtetutë, që buron nga kjo çështje.
Gjatë seancës dhanë qëndrimet e tyre për heqjen e imunitetit kryetarët e institucioneve të pavarura kushtetuese, që raportojnë në Kuvend : Kontrolli I Lartë i  Shtetit, Avokati i Popullit dhe Prokuroria e Përgjithshme.

Në mbyllje të diskutimeve, Kryetarja e Kuvendit Jozefina Topalli  falenderoi  deputetët dhe të ftuarit për ekspertizën dhe komentet e bëra, duke  vlerësuar seancën e sotme si shumë të rëndësishme dhe  të suksesshme. Kryetarja e Kuvendit ftoi dy relatorët zotin Edi Paloka dhe Pandeli Majko që të fillojnë  menjëherë punën për hartimin  e raportit,  për nismën e ndryshimit të  Kushtetutës, për heqjen e imunitetit .