Qytetarët mund të ndjekin dretpërdrejt zhvillimin e seancave plenare nga galeria për publikun në sallën e seancave plenare. Pjesëmarrja e individëve apo grupeve, që kërkojnë të ndjekin seancën plenare gjatë zhvillimit të saj, është e kushtëzuar nga kapaciteti i vendeve të disponueshme në galerinë për publikun.  Grupet apo individët që dëshirojnë të ndjekin drejtpërdrejt zhvillimin e seancave plenare nga galleria për publikun, duhet të paraqiten 1 orë para fillimit të seancës plenare në selinë e Kuvendit në Bulevardin “Dëshmorët e Kombit” për të përmbushur një formular kërkese për pjesëmarrje . Personat duhet të jenë të pajisur me një dokument identifikimi personal.
 
Personat që paraqesin kërkesën për pjesëmarrje, pasi u verifikohet identiteti, mund të pajisen me një fletëhyrje, në të cilën autorizohen të ndjekin dretpërdrejt zhvillimin e seancave plenare nga galleria për publikun në sallën e seancave plenare.
 
Hyrja e individëve apo grupeve kryhet nëpërmjet hyrjes kryesore të sallës së seancave plenare të Kuvendit në “Rrugën e Elbasanit”.

 

Për më tepër informacion kontaktoni me Drejtorinë e Marrëdhënieve me Publikun

Tel. + 355 (4) 2247322

e-mail:pritjaepopullit@parlament.al

            :ngjana@parlament.al

             :Mgjorga@parlament.al

 
- Kushtet e hyrjes dhe të qëndrimit në gallerinë për publikun në sallën e seancave plenare
 
Personat e pajisur me fletëhyrje në hyrje i nënshtrohen një kontrolli nga punonjësit e Shërbimit të Sigurisë dhe dorëzojnë veshjet e rënda, çantat, telefonat e lëvizshëm, çdo lloj tjetër aparatesh elektronikë dhe mjetesh të tjera të konsideruara të papërshtatshme nga punonjësit e Shërbimit të Sigurisë. Sendet e dorëzuara në hyrje do të ruhen në qese me numër sigurie në dhomën e sendeve të publikut dhe i dorëzohen personit përkatës në dalje.
 
Gjatë qëndrimit në galeri personave nuk u lejohet mbajtja e kapeleve. Personat në galeri duhet të qëndrojnë në heshtje dhe të mbajnë qetësi  gjatë zhvillimi të seancës plenare, si dhe të zbatojnë udhëzimet e dhëna nga punonjësit e Shërbimit të Sigurisë në hyrje. Është e ndaluar shfaqja e çdo lloj shenje miratimi ose mos miratimi gjatë ndjekjes së seancës plenare. Në rast ndërprerjeje të seancës personat duhet të largohen nga galleria në shoqërinë e punonjësve të Shërbimit të Sigurisë.
 
Shkelja e rregullit në galeri dhe në çdo mjedis tjetër të sallës së seancave plenare është shkak për shoqërimin jashtë këtyre mjediseve.