Kryetari i Kuvendit z. Gramoz Ruçi dhe delegacioni shqiptar, u pritën nga Presidenti i Rajonit Molise, Itali, z. Donato Toma

  • Postuar më, 15/04/2019

Kryetari i Kuvendit z.Gramoz Ruçi ndodhet për vizitë zyrtare dyditore në Itali, me ftesë të Presidentit të Dhomës së Deputeteve Fico dhe Presidentes së Senatit Casellati. Kryetari i Kuvendit z. Ruçi  në këtë vizitë shoqërohet nga Kryetari i Grupit Parlamentar të Partisë Socialiste z.Taulant Balla, Kryetarja e Komisonit të Jashtëm dhe Kryetare e Grupit të Miqësisë me Italinë znj.Mimi Kodheli, Kryetari i Këshillit të Qarkut Tiranë z.Aldrin Dalipi dhe Ambasadorja e Shqipërisë në Itali znj.Anila Bitri.

 Kryetari i Kuvendit z. Gramoz Ruçi dhe delegacioni shqiptar,  u pritën nga Presidenti i Rajonit Molise, Itali, z. Donato Toma, në Pallatin e Rajonit në Campobasso. Gjatë këtij takimi, z. Ruçi vuri në dukje se: “Ndodhem në Itali për të nxitur  bashkëpunimin me Senatin, Dhomën e Deputetëve e qeverinë italiane, por edhe bashkëpunimin e decentralizuar  me rajonet italiane. Italia është jo vetëm partnerja strategjike e Shqipërisë, por edhe shtëpia e dytë e rreth gjysëm milion shqiptarëve, të cilët kanë ndërtuar atje punën, jetën dhe shkollimin fëmijëve të tyre. Në rajonin Molize shqiptarët përbëjnë rreth 6% të të huajve. Lidhjet ekonomike, kulturore, politike e njerëzore midis Italisë dhe Shqipërisë, midis rajonit Molize dhe qarqeve të Shqipërisë, ndihmohen edhe nga prezenca e katër komunave arbëreshe në këtë rajon: Campomarino, Montecilfone, Portocannone dhe  Ururi. Jam njohur dhe ju përgëzoj për përpjekjet e mëdha që po bëni kohët e fundit në të gjityë Italinë, por vecanërisht në Molise, për të ruajtur dhe zhvilluar thesarin kulturor, gjuhën, kulturën dhe traditat e Arbëreshëve.” 

Kryetari i Kuvendit z.Ruçi bisedoi me Presidentin z.Toma, mbi bashkëpunimin e  suksesshëm të rajonit Molise  me ministri, agjenci dhe organe të qeverisjes vendore, mbështetetur edhe nga programet INTERREG, INTERREG-KARDS; INTERREG IPA II Itali-Shqiperi-Mali i Zi etj, dhe nënvizoi rëndësinë e zgjerimit të këtij bashkëpunimi me institucione e qarqe të tjera, të Shqipërisë.

Presidenti i Rajonit, Molise,z. Donato Toma e falenderoi Kryetarin e Kuvendit z. Gramoz Ruçi për vizitën në këtë rajon, si edhe në komunat arbëreshe dhe nënvizoi se bashkëpunimi me Shqipërinë është përparësi e bashkëpunimit ndërkombëtar të këtij rajoni. “Jam i impresionuar nga personaliteti, përvoja dhe kontributi i z. Ruci për zhvillimin e shoqërisë shqiptare dhe nxitjen e bashkëpunimit shqiptaro-italian”, vuri në dukje Presidenti Toma.